orain, begiak erdi-ilunera ohitu direnean, beha egiozu erlojuari. har ezazu zigarro bat, utz ezazu paketea mahai gainean eta itxaron ezazu. inguruko mahaiak hutsik daude ia denak, harritzen zara, goizegi da agian. ez itzazu alkandoraren goiko botoiak aska, ez baitu oraino berorik egiten. beroa gero etorriko da, jendearekin, hitz eta irrien zarata zoroarekin. kanpoan euria hasi du, zirimiri fina, hemengo jendearen izatemoldea markatzen duen lanbro hezea, plai ertzeko amoranteak uxatzen dituena, itxaron ezazu zeure aulkian eseririk, eska ezazu edozer gauza, eta ez zaitez egon denbora guztia ateari beha, ez baitira oraino zazpiak. ez zaitez has txaketa kentzen, ez du oraino berorik egiten. beroa gero etorriko da, jendearekin, hitz eta irrien zarata zoroarekin, kearekin, musikaren estridentziarekin. kanpoan euria ari du, zirimiri fina, hemengo jendeen izatemoldea markatzen duena, haien sinoaren tristezia gristatzen duen zirimiri fina. plai ertzeko paseoan zenbait aterki baizik ez da ezer ikusten. zenbait aterki, ezer ez besterik. itxaron ezazu zur ilunezko aulki arraro horretan eseririk, har ezazu beste zigarro bat, bigarrena. ia zazpiak dira eta laster etorriko da. zu konturatu gabe inguruko mahaiak betetzen joan dira, musikaren estridentziaren eraginpean bezala. jendearekin beroa hasi da, baina ez oraino hitz eta irrien zarata zoroa, kea, paretetako harri faltsuen izerdia. guzti hori gero etorriko da eta beroa soportagaitza izanen da igande arratsalde honetan. kanpoan ez du atertzen, zirimiri fina euri bihurtu da, hemengo jendeek hain ongi ezagutzen duten euri latza. plai ertzeko paseoan ez da jadanik ezer ageri, azkenengo aterkiek ere alde egin dute, duela zenbait denbora. ilundu du ia, ez dirudi udaberriaren hasieran gaudenik. utz ezazu bakean pospolo kaxa, eta itxaron ezazu zazpiak eta laurdenak arte. Barbarak etorriko dela esan badizu etorriko da, ez zaitez ardura, otoi. begira, atean dago, eskaileraren goi aldean, gortinaren gainetik aurpegia ikusten zaio. bakarrik etorri da? bai. lehengo eguneko abrigoarekin? bai, bai. beha iezaiozu eta nabari ezazu haren aurpegian zerbait ezezagun, zerbait ezkutu haren keinuan, ikus ezazu.
jakin nahi zenuen? baina ez, hitz egiozu eta eraman ezazu kanpora, horrenbeste jenderekin bero handia egiten baitu hemen, bero soportagaitza jadanik. kanpoan atertu egin du baina plai ertzeko paseoa hutsik dago. eskuin aldeko etxe-kak abandonatuak dirudite, geldirik, garai hobeak hel daitezen zain agian. hotzikara bat bere gorputzean, pasa ezazu orain zeure besoa haren gerritik, senti ezazu haizea zeure aurpegian, paseo ertzeko banku guztiak bustirik daude, ezin zarete eseri, senti ezazu haizearen hotza zeure gorputzean, zazpi eta erdiak erlojuren batean, arropen barna sartzen den negu haizea. segi ezazu isilik neon argiko farolen azpian, entzun ezazu itsasoaren higidura, uhain lehertuen masa zuria, jaitsi zaitez hondarrera. plaiak ere abandonatua dirudi udaberriaren hasierako egun honetan: iltzetzar eta burdin herdoildu, kortxo heze, botoila, taula usteldu, sentitzen du zure besoa bere gerria inguratzen? hitz egiozu orain, baina ez iezaiozu oraino zeure barnean sentitzen duzuna esan. hobe beste zerbait, edozein frase banal: Getarian ontzi bat ari da porturatzen, edo, oinak hondarrean sartzen zaizkit, eta bera erantzuten agian. gero berriro isiltasuna, uhainen ihardukia entzutera uzten duena. itsasoratzen zaren eran, zeure oinen azpian sentitzen duzu, hondarra hezeagoa da. esaiozu orain
ea nor heltzen den lehen ertzera, eta berak
zu, jakina, eta zuk
abantaila emanen dizut, edo beste zerbait, eragiten, eta berak
ez, zuri so, nahiago dut honela
ingura ezazu haren lepoa, haren ilea zeure behatzetan. geldi zaitez, ertzera heldu baitzara, han eta hemen hondakinen harat-hunata, marea apalaren erritmoari jarraikiz, haren ilea zeure behatzen artean.
zeuregana ezazu haren burua,
laztan ezazu haren ilea, behin, bitan, hirutan,
haren beharria, ausart zaitez,
haren masaila,
murmura ezazu edozein frase banal, aditu ezazu haren usaina, herts itzazu begiok, karizia ezazu zeure ezpainez haren masaila behin eta berriro eta senti ezazu orain haren besoa zure gerrian eta haren boza, kontent,
alkohol usaina dario zure ahoak, eta zuk
ez, baso bat besterik ez, zure zain
eta haren irria, kontent, beste masaila orain, haren irria, senti itzazu haren ezpainak zeure aurpegian, bai, behin eta berriro, haren besoa zeure gorputza bortizki inguratzen, bai, ausart zaitez, haren ahoa eta zeurea, istant batez, irribarre bat eta hasperen bat, UHAIN BAT, kontuz, ZEURE OINETARA, berezi zaitez, ah, madarikat, ia ia, oin bat busti zait
ikus ezazu zeure ondoan haren gorputza, zerbait arraro sentitzen duzu, zerbait arraro. baina ez, mundua mundu deino horrela gertatuko da, hitz berberak, oroitzapen berberak, gogoeta berberak. eta haatik beti berri. eta bestela zergatik lehen egunean, duela zenbait aste, zergatik telefonoz duela zenbait egun
ba al zatoz kafe bat hartzera?
ezin dut orain, berandu da
lehenago tristerik zeundela iruditu zait
ez, ez zen ezer, bueno bai, banoa, ordu laurden bat barru lehengo tokian
oroitzen zara, karizia ezazu emeki, haren espalda, Barbara,
ez zebilen inor kalean, ongi sentitzen zinen berarekin, haren ondoan, zerbait tarareatzen hasi zinen etxerantz berriro
haren espalda emeki, Barbara, senti ezazu berriro haren besoa zeure gerria inguratzen, isilik euria hasi zuen eta zeure zamarra bion gainetik jarri zenuen, haren besoa sentitu zenuen zeure gerria inguratzen
oroitzen zara, karizia ezazu emeki haren espalda, Barbara, karizia ezazu emeki haren besagaina, haren okotzpea. haren bularra? bai. eta orduan ikara hura, haren azalaren asaldamendu ezkutua, ni zurekin
jakin nahi duzu? baina ez. ez dakizu zer esan nahi duen horrek. ez da inoiz jakiten, dena alda dena hauts daiteke gauetik egunera, egunetik gauera, istant batean, eta orduan antsia hura, larridura esplikagaitz hura, hari mehe batetik zintzilik bezala, hitz batek, keinu gaizto batek ezezta dezakeena, memento batean gal daitekeen ondasuna, zerbait gertatu da eta betiko galdua dela zeuretzat. baina ez, irakur ezazu haren aurpegian, har ezazu haren eskua zeure eskuen artean, haren behatzak zeure behatzen artean, herts itzazu, orain bai orain ez. esaiozu eskuak hotzak dituzu, esan ezazu zerbait, apur ezazu isiltasun salatari hori bete ezazu, baina ez iezaiozu sentitzen duzuna esan. Ahalegin zaitez igartzen, ahalegin zaitez imajinatzen,
ahalegin zaitez oroitzen,
bai ahalegin zaitez oroitzen.
konta ezazu, bat,
bi,
hiru, senti ezazu ene bihotza,
lau bost
sei,
zazpi, senti ezazu ene bihotza, Barbara,
zortzi,
bederatzi,
hamar,
hamaika, senti ezazu ene bihotza,
entzun ezazu itsasoaren mugimendua, imajina ezazu uhain lehertuen masa zuria, karizia ezazu berriro, laztan ezazu, senti ezazu haren mihia, hortzak, hotz egiten du, dardarka, lant ezazu haren gorputza zeure besoetan. utz ezazu memento bat pasatzera, memento bat, ireki itzazu begiok eta ikus ezazu, beha egiozu aurpegira: bai. Bai? Bai.